पोखरालाई देशकै पर्यटनको राजधानी घोषणा गरिन्छ : पर्यटनमन्त्री लम्साल

पोखरालाई देशकै पर्यटनको राजधानी घोषणा गरिने भएको छ । गण्डकी प्रदेशका उद्योग, पर्यटन वन तथा वातावरणमन्त्री विकास लम्सालले पोखरालाई देशकै पर्यटनको राजधानी घोषणा गरिने वताउनुभएको हो ।

नेपाल पर्यटन बोर्डको आयोजना एवं आइडिया इनोभेसनको संयोजनमा आज पोखरामा पर्यटन उद्यमी सिड क्याम्पको शुभारम्भ गर्दै उहाँले पोखराका पर्याप्त पर्यटकीय सम्भावनालाई उजागर गर्न केन्द्रस्तरबाटै पर्यटनको राजधानी घोषणा गर्न लागिएको वताउनुभयो ।

प्रकृति र संस्कृतिले भरिपूर्ण पोखरा वरपरका हिमशृृङ्खला, तालतलैया, गुफा लगायतका सम्पदाले यहाँको पर्यटकीय आकर्षण बढाएको बताउँदै ती सम्पदाको संरक्षण र उपयोगमा सरकार लाग्ने मन्त्री लम्सालको भनाई थियो ।

कार्यक्रममा नेपाल पर्यटन बोर्डका वरिष्ठ निर्देशक काशीराज भण्डारी, बोर्डको पोखरा कार्यालयका प्रमुख मणिराज लामिछाने, आइडिया इनोभेसनका कार्यकारी प्रमुख कविराज जोशी, बोर्डको पोखरा कार्यालयका प्रशासन तथा कार्यक्रम अधिकृत प्रदीपराज गैरे लगायतले पोखरा र आसपासका पर्यटकीय सम्भावना लगायतका विषयमा आ–आफ्ना धारणा राख्नुभएको थियो ।

Facebook Comments