धनधान्यकी देवी महालक्ष्मीको पूजा आराधना गरी श्रद्धा भक्तिपूर्वक लक्ष्मी पूजा मनाईंदै

यमपञ्चकको तेस्रो दिनआज घरघरमा धनधान्यकी देवी महालक्ष्मीको पूजा आराधना गरी श्रद्धा भक्तिपूर्वक लक्ष्मी पूजा मनाइएको छ । आज दिनभरी ब्रतबसी बेलुकी धनधान्यकी देवी महालक्ष्मीको पूजा आराधना गरी घरघरमा दीपावली गर्ने चलन छ ।

आज घरको सबैतिर सफासुग्घर गरी दैलो, सङ्घार, झ्याल, ढोका, कौसी भर्याङ लगायतका ठाउँमा झिलिमिली पारी लक्ष्मीको स्वागत गर्नाले त्यस घरमा लक्ष्मीको बास हुने र सम्पन्नता छाउने धार्मिक विश्वास छ । आज साँझ मूलद्वारदेखि लक्ष्मी स्थापना गर्ने कोठासम्म गाईको गोबर र रातोमाटाले पोतेर चामलको पीठो एवं अबिरले लक्ष्मीको पैताला बनाई केराको सुत्लावा माटोको दियोमा बत्ती बाल्ने गरिन्छ ।

आज साँझमा दीपावली गरिसकेपछि गरगहना, पैसा, धान, चामल, फलफूल, रोटी र फूलमाला चढाई लक्ष्मीको मूर्ति वा तस्बिरमा पूजा गर्ने चलन छ । सत्ययुगमा भगवान विष्णुले तीन पाउ भूमि माग्दा दानवराज बलीले भगवानलाई सन्तुष्ट पारी दानवीरको अनुपम उदाहरण दिएको भन्दै आज बलिराजाको पनि बिशेष पूजागर्ने गरिन्छ ।

आजदेखी विभिन्न समुह बनाएर घरघरमा गई देउसी भैलो खेल्ने गरिन्छ । आजै लक्ष्मीको अवतारको रुपमा गाईको श्रद्धापूर्वक पूजागर्ने चलन छ । वैदिक सनातन धर्ममा गाईको स्थान उच्च छ । हिन्दु धर्ममा आमाको रुपमा हेर्ने गाईका हरेक कुरा पूजनीय मानिन्छन् ।

Facebook Comments