वर्तमान सरकार दलाल पूँजीवादीः नेपाल कम्युनिष्ट पार्टी प्रवक्ता विश्वकर्मा

विप्लव नेतृत्वको नेपाल कम्युनिष्ट पार्टीले आफूहरुलाई आतंककारीको पुष्टी गरेर देखाउन सरकारलाई चुनौति दिएको छ । विप्लव नेतृत्वको नेपाल कम्युनिष्ट पार्टी नेकपाले शनिबार राजधानीको भृकुटीमण्डपमा गरेको जनसभालाई सम्बोधन गर्दै प्रवक्ता खड्ग बहादुर विश्वकर्मा प्रकाण्डले आतंककारीको पुष्टी गर्न सरकारलाई चुनौति दिनुभएको हो ।

सरकारको कार्यशैलीबाट आफुहरुले वर्तमान सरकारलाई सामाजिक रुपको दलाल पुँजीवादी सरकार हो भनेर संश्लेषण गरेको भन्दै उहाँले बर्तमान सरकार कम्युनिष्ट रुपको कंग्रेस समेतलाई उछिन्ने दलाल सरकार रहेको टिप्पणी गर्नुभयो । आफूहरुलाई गर्ने व्यवहार लगायत सरकारका सबै घटनाक्रमले दलाल पुँजीपति वर्गको सरकार भएको पुष्टी गरिरहेको उहाको दावी थियो ।

आफ्नो पार्टीलाई अघोषित प्रतिबन्ध लगाउने प्रयास भईरहेको भन्दै प्रवक्ता प्रकाण्डले त्यसो नगर्न सरकारलाई चेतावनी दिनुभयो । आफुहरुको पार्टीका विरुद्ध दमन गर्ने सरकारको रुपमा ओली र प्रचण्डको पार्टी र सरकार तथा रामबहादुर थापा वादलको गृहप्रशासन आएको उल्लेख गर्दै उहाँले पार्टीलाई अघोषित प्रतिवन्ध लगाउने खेल चलिरहेको आरोप लगाउनुभयो ।

नेकपा माथि यस्तो हर्कत तुरुन्त रोक्न आग्रह गर्दै उहाँले त्यसो हुन नसके नेपाली जनताका सत्तारुढ नेकपा प्रतिबन्धित हुने चेतावनी दिनुभयो । मुलुकको राष्ट्रिय संकटको मुल कारक नै वर्तमान सरकार भएको भन्दै प्रकाण्डले निर्णायक क्रान्तिमा सहभागी हुन सवैलाई आव्हान गर्नुभएको छ । वर्तमान संकटको समाधान भनेको वैज्ञानिक र एकिकृत जनक्रान्ति र समाजवादको स्थापना भएकाले आफुहरुको आन्दोलनमा सहभागी हुन पनि उनले सबैलाई आव्हान गर्नुभयो ।
आजको जनसभालाई महासचिव नेत्रविक्रम चन्द विप्लवले सम्बोधन गर्ने बताईए पनि अन्तिम समयमा आएर उहाँ कार्यक्रममा सहभागी हुनुभएन । जनसभाअघि राजधानी काठमाडौंका विभिन्न स्थानबाट झाँकीसहितको र्याली निकालिएको थियो ।

Facebook Comments