जर्जियामा पहिलोपटक महिला राष्ट्रपति निर्वाचित

जर्जियामा पहिलोपटक महिला राष्ट्रपति बनेकी छिन । राष्ट्रपतिका लागि भएको निर्वाचनमा सालोम जुराबिशभिली निर्वाचित हुनुभएको हो । निर्वाचित भएसंगै उहाँ पहिलो महिला राष्ट्रपति बन्नुभएको हो । करिब ९९ प्रतिशत मतगणना सम्पन्न हुँदा फ्रान्समा जन्मेकी पूर्वकूटनीतिज्ञ सालोमले करिब ६० प्रतिशत मत प्राप्त गर्नुभएको छ । राष्ट्रपतिका लागि बुधबार दोस्रो चरणको मतदान भएको थियो । तर, विपक्षी दलहरुले मतदानमा धाँधली भएको जनाउँदै सडक प्रदर्शन गर्ने बताएका छन् ।

११ विपक्षी दलको गठबन्धनबाट उम्मेदवार भएका ग्राइगोल भाशाजले ४० प्रतिशत मत प्राप्त गर्नुभएको छ । हाल निर्वासनमा रहेका पूर्वराष्ट्रपति मिखाइल साकासभिलीको नेतृत्वमा ११ दलको गठबन्धन निर्माण गरिएको थियो । यो निर्वाचनलाई जर्जियाको लोकतान्त्रिक अभ्यास र जनताको अभिरुचि परीक्षणकारुपमा पनि हेरिएको छ । जर्जियाले युरोपेली युनियन र नेटोको सदस्यताका लागि पहल गरिरहेको छ ।

साथै, सन् २०२० मा हुने संसदीय निर्वाचनलाईसमेत यसपटकको राष्ट्रपतीय निर्वाचनले प्रभाव पार्नेछ । उक्त चुनावमा सत्तारुढ जर्जियन ड्रिम पार्टीले धेरैओटा विपक्षी दलहरुसँग प्रतिस्पर्धा गर्नुपर्नेछ । जर्जियन ड्रिम पार्टीले जुराबिशभिलीलाई राष्ट्रपतिका लागि समर्थन गरेको छ । नवनिर्वाचित ६६ वर्षीया जुराबिशभिली रुसी रेड आर्मीले जर्जियालाई रुसमा विलय गरेपछि सन् १९२१ मा पेरिसतर्फ निर्वासित भएका एकजना जर्जियाली शरणार्थीकी छोरी हुनुहुन्छ । उहाँ जर्जियाको स्वतन्त्र सांसद पनि हुनुहुन्थ्यो ।

पूर्वराष्ट्रपति साकाशभिलीले उहाँलाई विदेशमन्त्रीमा नियुक्त गर्नुभएको थियो । तर, एक वर्ष नतिब्दै पार्टिभित्रको द्वन्द्वका कारण उहाँलाई विदेशमन्त्रीबाट हटाइएको थियो । उहाँको समर्थनमा हजारौंले राजधानी टिब्लीसीमा विरोध प्रदर्शन पनि गरेका थिए । यसअघि, गत अक्टोबर २८ मा भएको पहिलो चरणको चुनावमा जुराबिशीभिलीले ३९ प्रतिशत र अर्का उम्मेदवार भाशाजले ३८ प्रतिशत मत प्राप्त गरेका थिए । जर्जियामा ३५ लाख मतदाता रहेका छन् । निर्वाचनमा करिब ५६ प्रतिशत मतदान भएको थियो ।

Facebook Comments