२० औं संस्करणको पोखरा सडक महोत्सव शुरु

अंग्रेजी नयाँ वर्षको अवसरमा आज शुक्रबारदेखि पोखरा सडक महोत्सव शुरु भएको छ । रेष्टुरेण्ट एण्ड बार एशोसियसन (रेवान) पोखराको आयोजनामा लेकसाइडको कोमागाने पार्क र शहिदचोकदेखि खहरे डिहिकोपाटनसम्म करीब साढे तीन किलोमिटर क्षेत्रको सडकमा
आजदेखि पुस १७ गतेसम्म अर्थात अंग्रेजी डिसेम्बर २८ देखी जनवरी १ सम्म महोत्सव हुनेछ ।

महोत्सवबाट आन्तरिक तथा वाहृय पर्यटन प्रबद्र्धन, जनजातिसँग सम्बन्धित लोपोन्मुख भेषभुषा, कला, संस्कृति, ग्रामिण क्षेत्रमा उत्पादित घरेलु सामाग्रीहरुको संरक्षणको उद्देश्य राखिएको छ । ‘सडकमै खाऔं, सडकमै नाचौं र सडकमै रमाऔं’ भन्ने नाराका साथ महोत्सवको आयोजना गरिएको हो । पोखराको शहिदचोकदेखि खहरे डिहिकोपाटनसम्म करीब साढे तीन किलोमिटर क्षेत्रको सडकमा महोत्सव हुने आयोजक संस्था रेबानले जनाएको छ ।

महोत्सवमा सडकमै राष्ट्रिय तथा अन्र्तराष्ट्रिय खानाका परिकारहरु, विभिन्न मनोरञ्जनात्मक खेलकुदका कार्यक्रमहरु, हस्तकला प्रदर्शनी, साहसिक पर्यटक खेलकुद, वृत्तचित्र प्रदर्शनी, वाल उद्यानलगायत आकर्षणका रुपमा रहने रेबानका अध्यक्ष बुधराज भुजेलले जानकारी दिनुभयो । ।

महोत्सवमा राष्ट्रिय तथा अन्र्तराष्ट्रिय सांस्कृतिक कार्यक्रम विशेष आकर्षणका रुपमा रहनेछन् भने नयाँ बर्षको दिन नयाँ बषएको स्वागतमा ‘न्यू इयर इभ’ विशेष कार्यक्रम आयोजना गरिनेछ । महोत्सवमा देशका सातै प्रदेशका पहिचान झल्कने सांस्कृतिक टोलीका साथै भारत, पाकिस्तान र चीनको सांस्कृतिक टोलीले पनि विशेष प्रस्तुती दिने सांस्कृतिक उपसमितिका संयोजक चौ बहादुर गुरुङले जानकारी दिनुभयो ।

आयोजकका अनुसार ख्यातिप्राप्त कलाकारहरुको लोक संस्कृतिमा आधारित दोहोरी, हास्य प्रहसन र साँझमा लाइभ कन्सर्ट आयोजना हुनेछ । यसपटक गाडीमा मिनि स्टेज बनाएर सडकमा समेत लाइभ कन्सर्ट आयोजना गरिने आयोजकले जनाएको छ ।

महोत्सवको अवसरमा पर्यटक दौड प्रतियोगिता, डुंगा खियाउने प्रतियोगिता, खुल्ला दौड प्रतियोगिता, रेष्टुरेण्टका कर्मचारीबीच ट्रे रेस प्रतियोगिता लगायतका खेलकुदका कार्यक्रम समेत समावेश गरिने रेबान पोखराका अध्यक्ष बुधराज भुजेल(भीमसेन)ले जानकारी दिनुभयो ।

पोखराका दर्शकलाई पैदल नै सहभागी हुन आग्रह

यसैबीच रेबानले पोखराका सडक महोत्सवको विशेष महत्वको दिन नयाँ बर्षको दिन आफ्ना सवारी साधन घरमै राखिदिन आग्रह गरेको छ । महोत्सवका दिन तनहुँ, पर्वत, स्याङ्जा, लमजुङ, बाग्लुङ, चितवन, काठमाण्डौं, धरान बुटवल लगायतका स्थानबाट पर्यटकहरु आउने भएकाले नयाँ बर्षको स्वागत गर्ने दिनमा भने पोखराका दर्शकहरुले पैदलयात्रा मार्फत् नै महोत्सव अवलोकन गरिदिएमा ट्राफिक व्यवस्थापन सहज हुने रेबानका पूर्व अध्यक्ष सुर्यबहादुर भुजेलको भनाई छ ।

सार्वजनिक यातायातको व्यवस्थापन मिलाइएकाले विशेष गरी पोखराका दर्शकहरुले नयाँ बर्षको एक दिन निजी सवारी साधन प्रयोग नगरिदिएमा सबैलाई सहज हुने उहाँको भनाई रहेको छ ।

Facebook Comments